• Login / Register
  • செய்திகள்

    வீட்டின் பூட்டை உடைத்து சோதனை; சவுக்கு சங்கர் மீது மேலும் ஒரு வழக்கு!

    கோவை மத்திய சிறையில் அடைக்கப்பட்டிருக்கும் பிரபல யூடியூப்பர் சவுக்கு சங்கரின் வீட்டின் பூட்டு உடைக்கப்பட்டு தீவிர சோதனை நடத்தப்பட்டுள்ள நிலையில் அவர் மீது மேலும் ஒரு வழக்கு பதிவு செய்யப்பட்டுள்ளது.

    காவல்துறை அதிகாரிகள், பெண் காவலர்கள் குறித்து அவதூறாக பேசிய வழக்கில், யுடியூப்பர் சவுக்கு சங்கரை கோவை சைபர் கிரைம் காவல்துறையினர் கடந்த 04.05.2024 தேனியில் வைத்து கைது செய்தனர்.

    அப்போது, சவுக்கு சங்கரின் காரில் இருந்து கஞ்சா பறிமுதல் செய்யப்பட்டது. பின்னர், அது தொடர்பாகவும் சவுக்கு சங்கர் மீது வழக்கு பதியப்பட்டது. அதன்பின் சவுக்கு சங்கர் நீதிமன்றத்தில் ஆஜர்படுத்தப்பட்டு கோவை மத்திய சிறையில் அடைக்கப்பட்டார்.

    இந்நிலையில், சென்னை மதுரவாயலில் உள்ள சவுக்கு சங்கர் வீட்டில் நீதிமன்ற உத்தரவுப்படி தேனி மாவட்ட போலீசார் சோதனையில் ஈடுபட்டனர்.

    சவுக்கு சங்கரின் வீடு பூட்டப்பட்டிருந்த நிலையில், மதுரவாயல் வருவாய் துறையினர் தாசில்தார் முன்னிலையில் பூட்டை உடைத்து உள்ளே சென்று போலீசார் சோதனை நடத்தினர். வீட்டில் கஞ்சா உள்ளிட்ட போதைப் பொருட்கள் உள்ளனவா என்பது குறித்தும் சோதனை நடத்தப்பட்டதாக போலீசார் தரப்பில் தெரிவிக்கப்பட்டுள்ளது.

    இதனையடுத்து, சவுக்கு சங்கர் மீது சென்னை மத்திய குற்றப்பிரிவு போலீசார் ஏற்கெனவே 2 வழக்குகள் பதிவு செய்திருந்தனர். அதாவது, பெண் பத்திரிக்கையாளர் சந்தியா ரவிசங்கர் மற்றும் தமிழர் முன்னேற்ற படை தலைவர் வீரலட்சுமி ஆகியோர் கொடுத்த புகாரின் அடிப்படையில் சவுக்கு சங்கர் மீது சென்னை மத்திய குற்றப்பிரிவு சைபர் கிரைம் போலீசார் வழக்கு பதிவு செய்திருந்தனர்.

    இத்தகைய சூழலில் சவுக்கு சங்கர் மீது சென்னை மத்திய குற்றப்பிரிவு போலீசார் மேலும் ஒரு வழக்கை பதிவு செய்தனர். கிளாம்பாக்கம் பேருந்து நிலையம் குறித்து அவதூறு பரப்பியதாக சிஎம்டிஏ நிர்வாகம் கொடுத்த புகாரின் அடிப்படையில் சவுக்கு சங்கர் மீது வழக்கு பதியப்பட்டுள்ளது.

    இந்நிலையில், 3 வழக்குகளிலும் சவுக்கு சங்கரை கைது செய்த சென்னை குற்றப்பிரிவு போலீசார், அவரை எழும்பூர் நீதிமன்றத்தில் நேற்றைய தினம் (10) ஆஜர் படுத்தினர்.

    அப்போது, மகளிர் சுய உதவிக்குழுவை சேர்ந்த பெண்கள் சவுக்கு சங்கருக்கு எதிராக முழக்கங்களை எழுப்பினர். மேலும், அவரை அழைத்து வந்த வாகனத்தின் மீது பெண்கள் தாக்குதல் நடத்தினர்.

    இதனால் எழும்பூர் நீதிமன்றத்தில் சிறிது நேரம் பதற்றமான சூழல் நிலவியது.

    Leave A Comment