11 மாவட்டங்களில் இன்று கனமழை; 6 நாட்களுக்கு மழை நிலைமை நீடிக்கும்!
தமிழ்நாட்டின் 11 மாவட்டங்களில் இன்று கனமழைக்க வாய்ப்பு உள்ளதாகவும் இன்று முதல் ஆறு நாட்களுக்கு மழை நிலைமை நீடிக்கும் எனவும் வானிலை ஆய்வு மையம் எதிர்வுகூறியுள்ளது.
இது தொடர்பில் சென்னை வானிலை ஆய்வுமையம் வெளியிட்ட செய்திக்குறிப்பு:
தமிழகப் பகுதிகளின் மேல் நிலவும் வளிமண்டல கீழடுக்கு சுழற்சி காரணமாக இன்றும், நாளையும் தமிழகத்தில் பெரும்பாலான இடங்களிலும், வரும் 19, 20-ம் தேதிகளில் சிலஇடங்களிலும், 21, 22 தேதிகளில் ஓரிரு இடங்களிலும் இடி, மின்னலுடன் கூடிய, லேசானது முதல் மிதமான மழை பெய்யக்கூடும்.
தமிழகத்தில் இன்று (17) கன்னியாகுமரி, தென்காசி, திருநெல்வேலி மாவட்டங்களில் ஓரிரு இடங்களில் கன முதல் மிக கனமழை என்று சென்னை வானிலை ஆய்வு மையம் கணித்துள்ளது.
நீலகிரி, திண்டுக்கல், திருப்பூர், தேனி, மதுரை, விருதுநகர், தூத்துக்குடி மற்றும் கோவை மாவட்ட மலைப் பகுதிகளில் ஓரிரு இடங்களில் கனமழை பெய்யும் என்று வானிலை ஆய்வு மையம் தெரிவித்துள்ளது.
நாளை (18) நீலகிரி, திண்டுக்கல், திருப்பூர் மற்றும் தேனி, கோவை மாவட்ட மலைப் பகுதிகளில் ஓரிரு இடங்களில் கனமழை பெய்யக்கூடும்.
மன்னார் வளைகுடா, தென் தமிழக கடலோரப் பகுதிகள் மற்றும் குமரிக்கடல் பகுதிகளில் இன்று முதல் வரும் 20-ம் தேதி வரை அதிகபட்சமாக மணிக்கு 55 கி.மீ. வேகத்தில் சூறாவளிக் காற்று வீசக்கூடும். எனவே, இந்தப் பகுதிகளுக்கு மீனவர்கள் செல்ல வேண்டாம் என அறிவுறுத்தப்படுகிறார்கள். இவ்வாறு கூறப்பட்டுள்ளது.
Leave A Comment