கன்னட சூப்பர் ஸ்டாரை இயக்கும் ரவி அரசு - 'ஜாவா' படம் தொடர்பில் அறிவிப்பு!
கன்னட சூப்பர் ஸ்டார் சிவராஜ்குமார் முதன் முதலாக தமிழில் கதாநாயகனாக அறிமுகமாகும் 'ஜாவா' படத்தை இயக்குநர் ரவி அரசு இயக்க உள்ளார்.
கன்னட சூப்பர் ஸ்டார் சிவராஜ்குமாருக்கு தமிழிலும் அதிகளவான ரசிகர்கள் காணப்படுகின்றனர்.
சூப்பர் ஸ்டார் ரஜினிகாந்தின் ‘ஜெயிலர்’ படத்தில் ஒருசில காட்சிகள் மட்டுமே வந்திருந்தாலும் சிவராஜ்குமாரின் நடிப்பு ரசிகர்களால் கொண்டாடப்பட்டது.
இந்நிலையில், நடிகர் சிவராஜ்குமார் ‘ஜாவா’ படத்தின் மூலம் தமிழில் நேரடியாக கதாநாயகனாக அறிமுகமாக உள்ளார். இத்திரைப்படம் அவரது 130 ஆவது படமாகும்.
கன்னடத் திரையுலகில் பல சிறந்த படைப்புகளை உருவாக்கியுள்ள சத்யஜோதி பிலிம்ஸ் டி.ஜி. தியாகராஜன் வழங்கும் இந்தப் படத்தை செந்தில் தியாகராஜன் மற்றும் அர்ஜுன் தியாகராஜன் ஆகியோர் தயாரிக்கின்றனர்.
இப்படத்தை இயக்குநர் ரவி அரசு இயக்க உள்ளார். கன்னட சூப்பர் ஸ்டார் சிவராஜ்குமார் தமிழில் முதல் முதலாக நடிக்கும் 'ஜாவா' படம் இயக்குநர் ரவி அரசின் மூன்றாவது படமாகும்.
தமிழ் மற்றும் கன்னடம் என இரு மொழிகளில் இந்தப் படம் உருவாக இருக்கிறது.
இதற்கு முன், நடிகர் அதர்வா முரளி கதாநாயகனாக நடித்த ‘ஈட்டி’ மற்றும் நடிகர் ஜிவி பிரகாஷ் நடிப்பில் வெளியான ‘ஐங்கரன்’ஆகிய திரைப்படங்களை ரவி அரசு இயக்கியுள்ளமை குறிப்பிடத்தக்கது.
படம் பற்றி இயக்குநர் ரவி அரசு கூறுகையில், “உலகம் முழுவதும் கோடிக்கணக்கான ரசிகர்களை கொண்ட சிவராஜ்குமார் போன்ற ஒரு நட்சத்திரத்தை இயக்குவது எனக்கு கிடைத்த பெருமை. இது ஒரு அவுட்-அண்ட்-அவுட் ஆக்ஷன் என்டர்டெய்னர் படமாக உருவாக்குகிறோம்.
அவரது ரசிகர்களை 100% திருப்திப்படுத்தும். அதே நேரத்தில், தமிழ் பார்வையாளர்களை ஆரம்பம் முதல் இறுதி வரை ஈர்க்கும். செப்டம்பரில் படத்தின் படப்பிடிப்பை தொடங்க திட்டமிட்டுள்ளோம்.
அடுத்த வாரம் ‘ஜாவா’ என்ற தலைப்பின் முக்கியத்துவத்தை வெளிப்படுத்துவதற்கான கிளிம்ப்ஸ் காட்சியை படமாக்க உள்ளோம்” என்றார்.
மேலும், “இந்த திரைப்படத்தில் ‘ஜாவா’ பைக்கிற்கு ஒரு முக்கிய பங்கு உண்டு. இப்போதைக்கு அதுமட்டும்தான் என்னால் சொல்ல முடியும்” என்றார்.
படத்தின் நடிகர்கள் மற்றும் குழுவினர் பற்றி கூறும்போது, நடிகர் சிவராஜ்குமார் போலீஸ் கதாபாத்திரத்தில் நடிக்கிறார், சமுத்திரக்கனி ஒரு முக்கிய கதாபாத்திரத்தில் வருகிறார் என்றார்.
Leave A Comment